ഇന്ന് ഈ മുറിയിൽ ഇരിക്കുന്ന നിങ്ങൾ ഈ ലോകത്തിലെ ഏറ്റവും ഭാഗ്യവാന്മാരാണ്. എന്റെ പ്രഭാഷണം ആരംഭിച്ചു. 50 പേർ അന്ന് മുറിയിൽ ഉണ്ടായിരുന്നുവെന്നാണ് എന്റെ ഓർമ്മ. കോളേജിൽ പഠിക്കുന്ന കാലം. സിംഗപ്പുരിലെ ഒരു ബന്ധുവാണ് പുതിയ കച്ചവടം പരിചയപ്പെടുത്തിയത്. സംഗതി ഇന്റർനെറ്റ് വഴിയാണ്. മൾട്ടി ലെവൽ മാർക്കെറ്റിങ് ആംവ പ്പോലെ എന്നൊക്ക പറഞ്ഞു ഞാൻ അതിൽ ചേർന്നു. ആംവേ കഴിഞ്ഞ 100 വർഷമായി പ്രവർത്തിക്കുന്ന കമ്പനിയാണത്രേ.
എന്തായാലും ഇത് അതുപ്പോലെയുള്ള ഒരു കമ്പനി. ഇന്റർനെറ്റ് ഇന്ത്യയിൽ തന്നെ ജനങ്ങളുടെ ഇടയിൽ പ്രചാരത്തിലാവാൻ തുടങ്ങി രണ്ടുവർഷമേ ആയിട്ടുള്ളു. അപ്പോൾ വന്ന പുതിയ ബിസിനസ് സംരഭം എന്ന നിലയിൽ അതിന്റെ മാർക്കെറ്റിങ് പ്രവർത്തനത്തിന് പഠനത്തിന്റെ ഒപ്പം തന്നെ ഇറങ്ങി. കടം വാങ്ങിയ കോട്ടും ധരിച്ചു സായിപ്പിനെ പോലെ ഇംഗ്ലീഷിൽ അര മണിക്കൂർ നീണ്ട ബിസിനസ് പ്രഭാഷണം.അതും മലയാളം മാത്രം അറിയാവുന്നവരുടെ മുന്നിൽ.
തൃശൂർ, എറണാകുളം, പറവൂർ, കൊടുങ്ങല്ലൂർ, ഇരിഞ്ഞാലക്കുട, മലപ്പുറം, കോഴിക്കോട് തുടങ്ങിയ സ്ഥലങ്ങളിൽ ഏതാണ്ട് 20-30 വേദികളിൽ ആറ് മാസത്തിനകം സംസാരിച്ചു കാണും. ബിസിനസിൽ ലഭിച്ച ഡോളർ ചെക്ക് പൊക്കി കാണിച്ച് സംഗതി ജോലി ചെയ്താൽ സമ്പാദിക്കാൻ പുതിയ വഴി എന്നൊക്കെയുള്ള രീതിയിൽ പ്രസംഗിച്ചു തകർത്തു. ഓരോ വേദികൾ പിന്നിടുമ്പോൾ പുതിയവർ ബിസിനസ്സിൽ പങ്ക് ചേർന്നു. പണം ലഭിക്കുന്ന കാര്യമാണെങ്കിൽ സ്വന്തമായി വെബ്സൈറ്റ് വാങ്ങിക്കുവാൻ ആൾക്കാർ തയ്യറാണ്. കമ്പനി അമേരിക്കൻ, ഞാൻ അവരുടെ ജോലിക്കാരനല്ല.
ഞാനും നിങ്ങളും ഒരുപോലെ. നിങ്ങൾ പറഞ്ഞു എത്ര പേർ വെബ് മുറി വാങ്ങുന്നു, അതിനനുസരിച്ചു കമ്മീഷൻ.
ഒരു സ്ഥലത്ത് ഒരാൾ ഇത് ചെയിൻ എന്ന് പറഞ്ഞു എതിർപ്പ് പ്രകടിപ്പിച്ചു. നിങ്ങളുടെ ബിസിനസും ചെയിൻ തന്നെയാണ്. ലോകത്ത് എല്ലാ ബിസിനസും ചെയിൻ തന്നെയാണ് സാർ, കൃത്യമായി മറുപടി കൊടുത്തു. പ്രോഡക്റ്റ് ആവശ്യമുണ്ടെങ്കിൽ വാങ്ങിച്ചാൽ മതിയെന്നാണ് ഞാൻ അവരോട് പറഞ്ഞത്. ഇങ്ങനെ വാഗ്ദാനം കൊടുക്കുന്നത് ശരിയാണോയെന്ന് ഒരു രാഷ്ട്രീയക്കാരൻ ചോദിച്ചു. സാർ ഇതിൽ നടക്കാവുന്ന കണക്ക് മാത്രമേയുള്ളു… നടക്കാത്ത വാഗ്ദാനങ്ങൾ ഞാൻ കൊടുക്കുന്നില്ല, പണിയെടുത്താൽ നിങ്ങൾക്ക് ഒരു ചെറിയ തുക കിട്ടുമെന്ന് പറയുന്നതാണോ തെറ്റ്?
കമ്പനി ഉള്ളിടത്തോളം, ഇതിൽ തെറ്റ് സംഭവിക്കില്ല, ഞാൻ ഉറപ്പു കൊടുത്തു. ആവെ 100 വർഷമായി ഓടുന്നു. ഇത് പുതിയതാണ് അതാണ് ആകെയുള്ള വ്യത്യാസം.ആൾക്കാർ കൂടിതുടങ്ങി.
കോഴിക്കോട് ഒരു സ്വാമിയുടെ വീട്ടിൽ ചർച്ചക്ക് പോയി. ഒരു പാട് പേർ അയാളുടെ കാല് തൊട്ട് വന്നിക്കുന്നു. അവിടെ ചർച്ചക്ക് ശേഷം എനിക്ക് ചില പ്രശ്നങ്ങൾ മനസ്സിൽ ഉടലെടുക്കാൻ തുടങ്ങി. ചാരിറ്റി പ്രവർത്തനങ്ങൾക്ക് ഉപയോഗിക്കാം, എല്ലാ സത്യങ്ങളും പറയേണ്ട തുടങ്ങിയ ഉപദ്ദേശങ്ങൾ വരാൻ തുടങ്ങി. ഒരു വലിയ ബ്രേക്ക് മുന്നിൽ വന്ന് വിളിക്കുന്നു. അയാൾ കാവി എടുത്ത സ്വാമി, ഞാൻ കോട്ടിട്ട സ്വാമി, ഒരുമിച്ചാൽ ഒരു പാട് പണം എന്നെ തേടി വരും. പഠനം അവസാനിപ്പിക്കാൻ തയ്യാറായി വേണം അടുത്ത നീക്കം. കാര്യങ്ങൾ അങ്ങനെയാണ് പോകുന്നത്. അത്രയധികം മനുഷ്യരെ അത് ആകർഷിച്ചേക്കാം. ഒരു വലിയ വിജയത്തിലേക്ക് നീങ്ങുന്നു, അതാണ് എനിക്ക് ലഭിച്ച സൂചന.
പക്ഷേ, അന്ന് രാത്രി ഞാൻ ഒരു തീരുമാനമെടുത്തു. ഇനി വേണ്ട. ഈ വിജയം വേണ്ടെന്നു വെക്കുന്നു. ഈ വിജയം തീക്കളിയാവുമെന്ന് സംശയം തോന്നി.
കൂടെയുള്ളവർ എന്നോട് ദേഷ്യപ്പെട്ടു. "നീ മാത്രം പുണ്യാളൻ ആകാനാണോ," അവസരങ്ങൾ വന്നത് തട്ടികളയാൻ പലർക്കും മടി. അതോടെ ഞാൻ അവരോട് തുടരാൻ പറഞ്ഞു. ഞാൻ സംസാരിക്കുമെന്ന് കരുതിയാണ് അവർ നിന്നതെന്ന് പറഞ്ഞുകൊണ്ടിരുന്നു. അത് കേട്ടപ്പോൾ ഞാൻ ഉറപ്പോടെ പറഞ്ഞു എങ്കിൽ തീർച്ചയായും ഞാൻ ഇനി ഉണ്ടാകില്ല.ഒരാളെ മാത്രം കണ്ടു നടത്താൻ പറ്റിയ ബിസിനസ് ആയി എനിക്ക് തോന്നിയില്ല.
അങ്ങനെ അത് അവസാനിപ്പിച്ചു.
ആറ് മാസത്തിനുള്ളിൽആർ ബി ഐ, ബിസിനസ് ഇന്ത്യയിൽ നിരോധിച്ചു. ഡയറക്റ്റ് സെല്ലിങ് ലൈസൻസ് മാനദണ്ഡങ്ങൾ പാലിക്കുന്നില്ലെന്ന് വാർത്തകൾ വന്നു. മൂന്നു വർഷത്തിന് ശേഷം പിന്നീടെപ്പോഴോ കേട്ടു അമേരിക്കയിലും ഈ കച്ചവടം നിരോധിച്ചു,പണം നഷ്ടപ്പെട്ടവർക്ക് എത്രയോ പണം നഷ്ടപരിഹാരം ഫെഡറൽ ഓഫീസിൽ ബന്ധപ്പെട്ടാൽ ലഭിക്കുമെന്ന് വാർത്തകൾ വന്നതായി കേട്ടു.
അടിക്കുറിപ്പ് : ഡയറക്റ്റ് സെല്ലിങ്ങിൽ ഇന്ത്യയിൽ 450 കമ്പനികൾ ആവെ അടക്കം ഇപ്പോഴും പ്രവർത്തിക്കുന്നു.
7 വർഷം മുമ്പ് ഒരു ആവെ പയ്യൻ എന്റെ അടുത്ത് വന്നു ഞാൻ പറഞ്ഞ അതേ ബിസിനസ് ലാഭ കഥകൾ എന്റെ അടുത്ത് പറഞ്ഞു. സഹതാപം തോന്നിയത്കൊണ്ട് ഞാൻ കേട്ടിരുന്നു. ഒരു പ്രോഡക്റ്റ് വിൽക്കാനുള്ള കഷ്ടപ്പാട് എന്താണെന്നു സ്വയം മനസിലായയതിനു ശേഷമാണു ഈ ഒരു അനുഭവം. അതുകൊണ്ട് തന്നെ മുഴുവൻ സമയവും ഞാൻ അവനെ കേട്ടിരുന്നു.
